اگر کوئی میسیج پر خود کو معصوم کہے تو اس پر کیا حکم شرع ہے؟
بِسْمِ اللہِ الرَّحْمٰنِ الرَّحِیْمِ
`اَلْجَوَابُ بِعَوْنِ الْمَلِکِ الْوَھَّابِ اَللّٰھُمَّ ھِدَایَۃَ الْحَقِّ وَالصَّوَابِ`
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
معصوم کہتے ہیں جو اللہ پاک کی حفاظت میں ہو اور اس وجہ سے اس کا گناہ کرنا ناممکن ہو۔ انبیاء علیہم السلام اور ملائکہ کے علاوہ کوئی بھی معصوم نہیں۔ اولیاء کو اللہ پاک اپنے کرم سے گناہوں سے بچاتا ہے مگر معصوم صرف انبیاء اور فرشتے ہی ہیں۔ اماموں کو انبیاء کی طرح معصوم سمجھنا گمراہی وبددینی ہے۔ عُرف حادث میں بچوں کو بھی معصوم کہتے ہیں لیکن شرعی اصطلاحی معنیٰ اس سے مراد نہیں ہوتے بلکہ لغوی معنیٰ یعنی بھولا، سادہ دل، سیدھا سادھا، چھوٹا بچہ، نا سمجھ بچہ، کم سن، والے معنیٰ میں کہا جاتا ہے۔ اس لئے اس معنیٰ میں بچوں کو معصوم کہنے پر کوئی گرفت نہیں اسے ناجائز بھی نہیں کہہ سکتے۔ لہذا صورتِ مسؤولہ میں اگر وہ شخص اپنے آپ کو معصوم کہے تو اسے سمجھایا جائے کہ معصوم ہونا صرف انبیاء اور ملائکہ کا خاصہ ہے اگر وہ مان جائے فبہا ورنہ وہ اہلِ سنت سے خارج ہے۔ اس کو اس کے حال پر چھوڑ دیا جائے۔
انبیاء معصوم ہوتے ہیں،چنانچہ سیف اللہ المسلول علامہ فضل الرسول بدایونی رَحْمَۃُ اللہِ تَعَالٰی عَلَیْہِ (المتوفی:1289ھ) لکھتے ہیں:”فمنه العصمة: وهي من خصائص النبوۃ علی مذہب أهل الحق“ یعنی تو ان (یعنی جو انبیاء علیہم السلام کے بارے میں واجب ہیں) میں سے عصمت ہے اور یہ اہلِ حق کے مذہب پر نبوت کی خصوصیات سے ہے۔ (المعتقد المنتقد، الباب الثانی في النبوات، ما يجب الأنبياء عليهم السلام، صفحة:173، دار المنيف، الهند)
فرشتے بھی معصوم ہوتے ہیں،چنانچہ مُلّا علی بن سلطان محمد نور الدین حَنَفی رَحْمَۃُ اللہِ تَعَالٰی عَلَیْہِ (المتوفی:1014ھ) لکھتے ہیں:”(وملائکته) بأنهم عباد مكرمون لا يسبقونه بالقول وهم بأمره يعملون، معصومون ولا يعصون الله“ (منح الروض الأزهر في شرح الفقه الأكبر، بيان أصول الإيمان، صفحة:18، مجلس المدينة العملية الدعوة الإسلامية)
اللہ پاک اولیاء کو گناہ سے محفوظ رکھتا ہے، ان سے گناہ نہیں ہوتا، مگر ہو تو شرعاً محال بھی نہیں، ’چنانچہ بريقة محموديه شرح طريقة محمديه‘ میں ہے:”اعلم أنّه لا تجب عصمة الولي کما تجب عصمة النبي لکن عصمته بمعنی أن یکون محفوظاً لا تصدر عنه زلة أصلاً، ولا امتناع من صدورہا، وقیل للجنید: هل یزني العارف؟ فأطرق ملیاً ثم رفع رأسه وقال:{وَ كَانَ اَمْرُ اللّٰهِ قَدَرًا مَّقْدُوْرًا}[پارہ:22، الأحزاب:38]. (چنانچہ بريقة محموديه شرح طريقة محمديه، جلد:2، صفحة:1)
اعلیٰ حضرت امام احمد رضا خان رَحْمَۃُ اللہِ تَعاَلیٰ عَلَیْہِ (المتوفی:1340ھ) لکھتے ہیں:”اجماعِ اہلسنت ہے کہ بشر میں انبیاء علیہم الصلاۃ والسلام کے سوا کوئی معصوم نہیں، جو دوسرے کو معصوم مانے اہلسنت سے خارج ہے پھر عرفِ حادِث میں بچوں کو بھی معصوم کہتے ہیں یہ خارج ازبحث ہے جیسے لڑکوں کے معلم تک کو خلیفہ کہتے ہیں۔“ (فتاویٰ رضوی، جلد:14، صفحہ:188، رضا فاؤنڈیشن دعوت اسلامی)
صدر الشریعہ مُفتی محمد امجد علی اَعظَمی رَحْمَۃُ اللہِ تَعَالٰی عَلَیْہِ (المتوفی:1367ھ) لکھتے ہیں:”نبی کا معصوم ہونا ضروری ہے اور یہ عصمت نبی اور مَلَک کا خاصہ ہے، کہ نبی اور فرشتہ کے سوا کوئی معصوم نہیں۔ اماموں کو انبیا کی طرح معصوم سمجھنا گمراہی و بد دینی ہے۔ عصمتِ انبیا کے یہ معنی ہیں کہ اُن کے لیے حفظِ الٰہی کا وعدہ ہو لیا، جس کے سبب اُن سے صدورِ گناہ شرعاً محال ہے، بخلاف ائمہ و اکابر اولیا، کہ اﷲ عزوجل اُنھیں محفوظ رکھتا ہے، اُن سے گناہ ہوتا نہیں، مگر ہو تو شرعاً محال بھی نہیں۔“ (بہارِ شریعت، عقائد متعلقہ نبوت، جلد:1، حصہ:1، صفحہ:38-39، مجلس المدينة العملية، دعوت اسلامی)
فرہنگِ آصفیہ میں معصوم کے درج ذیل معانی لکھے ہیں: ”معصوم: (1)گناہ سے بچا ہوا۔ بے قصور۔ پاکدامن۔ (2)بھولا۔ سادہ دل۔ سیدھا سادھا (3)چھوٹا بچہ، کم سن بچہ، ناسمجھ بچہ۔“ (فرہنگ آصفیہ، جلد:2، صفحہ:1090)
والله تعالیٰ اعلم بالصواب
از قلم: محمد اویس العطاری المصباحی
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
